城中鏡：車壇「鋼鐵俠」唔識都教授

人稱「鋼鐵俠」嘅馬斯克依家去咗內地，早前佢接受央視訪問，節目主持人讚佢係喬布斯、鋼鐵俠同都敏俊嘅結合體，仲問佢覺得自己似邊個多啲，點知馬斯克話唔識都敏俊喎！佢呢個答法，明顯係對主持人嘅爛gag唔多受落。

唔單只馬斯克唔多like主持人，網民都彈主持人問得無水準！有博客撰文批評央視主持人嘅問題太過業餘，唔使問都估到對方會講乜，同埋就算上百度都搵到答案！就好似「你為甚麼這麼願意在一個細節上打造這麼極致？」「你是否看好自己做嘅行業？」博客就嘲諷話佢問得真係「好」，就好似問一個女仔點解將自己打扮得咁靚一樣，咁有深度同有內涵！

馬斯克今次去內地，係為咗推廣佢哋嘅車，佢話特斯拉未來會愈來愈便宜，等平民都上到車。特斯拉嘅第一架車係跑車，第二架係model S，而第三架會更平，應該係平民可以接受嘅價格。佢認為應該先由最高級嘅車型做起，為特斯拉生產平民價格車型提供基礎，而呢個過程係必要嘅。