香港大學學生會早前舉行高桌晚宴款待新校長馬斐森伉儷，但竟然有五分一已報名參加嘅學生無付款兼臨時「甩底」，五十份預先訂購嘅食物白白浪費。雖然學生會喺最後關頭仍不斷呼籲學生參加，仲將啲剩餘食物轉贈其他學生，但最終仍致財政虧損約一萬二千八百元。學生會為浪費食物向同學致歉，並自行提出遺憾動議案，以示警惕自戒。

馬斐森伉儷（右六同右五）參加學生會高桌晚宴，但五分一學生「甩底」。（互聯網圖片）

學生會會長梁麗幗尋日話，原本有二百五十名學生報名參加高桌晚宴，每人費用二百元。馬斐森伉儷、學生事務長周偉立由會方宴請，毋須付款。不過，喺晚宴舉行前夕，學生會發現只有約二百人付款，由於食物已提前預訂，令學生會大失預算。會方當時已呼籲其他屬會、舍堂等學生參加，晚宴當晚亦把部分食物轉贈其他學生，但有兩、三盆食物因無法保存而扔掉。

佢重申，學生會會檢討舉辦活動的做法及流程，包括提早核實參加人數同收費，亦會同食物供應商加強溝通，避免同類事件再發生。喺今次事件，無幹事需問責辭職，學生會已吸取教訓，日後將更謹慎喎！

第一手消息請下載on.cc東網iPhone/iPad/Android/Windows Phone Apps