城中鏡：紅A姊妹接棒 膠出創意潮味
喺呢個新時代，只要有創意，傳統家庭用品都可以潮味十足。以生產塑膠家品聞名嘅本地老字號「紅A」，今年適逢成立六十五周年，接班嘅第三代梁慕蘭同Jessica梁馨蘭兩姊妹，同一班80、90後設計團隊齊搞新意思，推出一系列顏色鮮艷嘅廚具家品。呢批新系列尋日首次亮相，新意同趣味十足。
梁慕蘭（右）同梁馨蘭為品牌注入新生命。
孫榮聰把玩可調校窿位嘅「轉換式筲箕」。
周瑞難忘經典紅色膠水桶。
Jessica話曾經有朋友向佢反映，婚後原本想用佢哋嘅產品，點知畀佢老公嫌老土。修讀過設計嘅佢於是決定為品牌改頭換面，用咗近八個月籌備成立新公司，目標係設計一物多用、外形新穎嘅家品系列，用家以年輕夫婦為主。
筲箕窿位可調校大細
現場展示一個去水窿位可以調校大細嘅「轉換式筲箕」，就好受歡迎。香港貿發局製造業拓展總監Ralph周瑞仲一語雙關，盛讚話呢種篩選方式一定冇人反對喎！Ralph都係「紅A」用家，笑稱經歷過制水年代嘅佢，先可以深切體會到一個耐用嘅水桶係幾咁重要。佢又話傳統品牌想要延續發展，一定要研發高增值產品，好似歐洲品牌都歷史悠長，但係國際上就仲未有一個可以代表香港嘅塑膠品牌。佢認為紅A見證過去六十幾年本地發展，又堅持香港製造，好值得支持。
香港塑膠業廠商會主席Eric孫榮聰都有到場，佢話Jessica祖父紅A創辦人梁知行係該會創會主席，所以一定要嚟支持。Eric話屋企都有好多紅A招牌膠櫈，平時疊埋一幢，每次一打麻雀坐通宵，就係呢啲櫈出動嘅時候喇！
