政壇：搞搞政：「唱好香港」無影 建制派失職
話說外號「李漢奸」嘅白鴿黨創黨主席李柱銘夥拍「民主阿婆」前政務司司長陳方安生，早前完成美加「唱衰香港」之旅，港府不遲不早緊接邀請美國國會人員代表團訪問香港，仲搭好平台等佢哋同立法會議員會面，明眼人都諗到係想建制派幫手發表「唱好香港」言論，可惜建仔等建制大戶集體失職無影。莫非建制派自知英文水皮，費時現身講英文獻醜？
設計圖片及對白
美國國會議員助理等一行七人尋日到訪立會，就財經、旅遊等議題同議員交流意見，據知呢次會面只有四人報名參加，泛民方面有資訊科技界莫乃光、會計界梁繼昌同白鴿黨涂謹申，建制唯一代表係紡織及製衣界鍾國斌，點知梁、涂又臨時缺席，最後剩番莫、鍾撐足全場。
譚耀宗搵人代答英文
莫乃光澄清只係捱義氣代表泛民出席「娛賓」，期間先後向佢哋講解立法會組成、何謂功能組別同開會座位分配後，已差唔多夠鐘散會，最後僅僅夠時間介紹埋立會即將又有拉布戰上演。鍾國斌就話席間已警告咗美方唔好干預中國內政，但有人私下話建仔作為建制大戶有十多名議員，竟然冇一個夠膽現身同美方代表同場辯論，認真抵打同講唔過去囉！
講開又講，建仔尋日公布政改方案，亦再次印證點解冇人敢於同美方代表溝通。話說建仔中委會會議後公布二○一七年特首普選方案，建議提名委員會人數由一千二百至一千六百人組成，有意參選者獲得不少於十分之一提委支持就可「入閘」，倘取得提委會過半數有效票則可「出閘」，候選人數目則限定二至四人，殊不知記者會舉行期間有人以英文提問，黨主席譚耀宗即時反應係等等先，答晒所有中文提問，最後先由黨副主席張國鈞以英文回答，由於張並非立會議員，由此路進，就明晒點解冇人同美方代表溝通喇！
