近期政商圈子屢傳有貪贓枉法分子被調查，咁敏感嘅時刻，身兼考試及評核局主席嘅全國青年聯會副主席Rock陳仲尼，尋日早上九點四十五分左右突然現身廉政公署，見佢入去時行色匆匆，神情有啲緊張，認真耐人尋味。第一時間致電阿Rock問個究竟，原來證實係虛驚一場。

陳仲尼行色匆匆現身廉署，事後證實係虛驚一場。

阿Rock笑笑口話自己係以太平紳士身份去視察廉署，主要係睇吓認人程序係咪符合公正、公平原則，期間逗留大約一個小時。

雖然係隨機被抽中去巡視，不過阿Rock都好認真，仲即時察覺疑似唔公平嘅安排，話說廉署當時進行緊真正嘅認人程序，佢見到八個演員扮嫌疑人，但係該批演員嘅衣着、外表同埋年紀各不相同，佢即刻提出意見，事關嫌疑人唔係應該有一定特徵咩？

佢仲話今次係佢咁大個人第一次踏足廉署，點知就被記者撞到，佢事後為免大家諗多咗，仲特登傳廉署邀請佢去巡視嘅信件畀記者參考添！咁廉署有冇請佢飲咖啡？佢笑稱：「冇喎！連杯水都冇！」

第一手消息請下載on.cc東網iPhone/iPad/Android/Windows Phone Apps