唔少金融公司都會有個戰績龍虎榜,用嚟激勵員工,幫公司撈多啲單。

聽聞美銀美林最近成立一個新的「精英俱樂部」,講明一年要做到八百萬美元嘅生意先至入得,而「入會」福利包括一萬美元現金獎勵、被冠以精英經紀之名、可以在公司網頁sell自己、擁有各項優先權等,對於呢個德政,美林就不予置評。

有行內人話入到精英班,簡直係「飛上枝頭變鳳凰」,仲有好多着數,例如可以參加公司喺度假村舉行一連幾日的「精英會議」;若然你幫公司搵到八百萬美元以上嘅收入,額外嘅獎勵仲唔止一萬美元添!

其實,依家美銀美林財富管理都有一個「Circle of Champions」,匯聚公司top sales,但入門門檻只係四百萬美元佣金同手續費,比新嘅「精英俱樂部」少一半。

其他大行好似摩根士丹利、瑞銀財富管理咁,佢哋類似嘅俱樂部要求每年收入達二百萬至三百萬美元,比美銀美林嘅要求低。

第一手消息請下載on.cc東網iPhone/iPad/Android/Windows Phone Apps