白鴿黨「AV仁」何俊仁早前被揭喺會議廳睇少女模特兒相,畀各界鬧爆之後,連德高望重嘅立法會主席曾鈺成都出事。話說前晚有網民眼利發現,曾鈺成嘅社交網站專頁突然分享一條疑似係色情短片嘅連結,即時令網民瘋傳。呢件事爆出後,曾鈺成一直未親身回應,尋日反而喺社交網站上載日本旅遊照,唔通佢想證明自己身在外地,唔關佢事?

曾鈺成罕有將外遊照片擺上網,以印證自己確實不在香港。

曾鈺成嘅社交網站向來好「滯後」,例如佢早前去完上海,事隔兩日先將當地遊覽照片擺上網。但佢尋日即時擺咗五張喺京都賞櫻照片,力證自己唔喺香港。不過,互聯網呢家嘢,無分地域疆界喎,唔一定要人在香港先可以上網。

身在日本嘅曾鈺成回覆查詢時話,完全唔知發生乜嘢事,前晚有助理同佢講,佢先知呢單嘢。

曾鈺成強調好相信職員,今次絕對唔關職員事,估計係專頁太耐無轉密碼,被黑客闖入所致,佢已叫職員轉第二個密碼,防止事件再發生。

第一手消息請下載on.cc東網iPhone/iPad/Android/Windows Phone Apps