政壇：社團搞政治講座吸新血
當香港二○一七年可以普選特首之後，就有可能喺二○二○年普選立法會，雖然社會有唔少聲音都話，對普選特首方案能否通過唔存在任何希望，不過由陳振彬做會長同王惠貞做理事長嘅九龍社團聯會，似乎就已經為二○二○年做好準備。據聞佢哋依家仲會不時舉辦講座，探討選舉、競爭同香港依家等政治議題，邀請啲大專學生參加添！莫非想喺地區收定啲新丁，等將來有機會就打正旗號參選？
設計圖片及對白
唔驚無間道滲入
有聯會中人透露，其實聯會早前已舉辦過第一期政治議題講座，近日開班搞第二期講座，探討內容包括選舉、競爭等政治議題，並邀請到嶺南大學公共管治研究部主任李彭廣同立法會前議員程介南等星級主講嘉賓授課，所以有唔少區議員都會耐唔耐去上吓堂，而課程目的就係要培育地區新血，為二○二○年普選立法會做好準備。
聽起上嚟似乎同建仔嘅政治專才文憑課程有啲相似，但有關人士就話兩者唔同，一嚟九龍社團聯會呢個課程係免費，二嚟佢哋冇證書，但凡佢哋嘅義工、議員助理或任何獲得聯會或屬下組織推薦嘅市民，有意報名參加，咁就有得出席呢啲講座嘞！
老實講，「蛇齋餅糉」呢啲民生招數，依家已經唔係建制派嘅專利，泛民都有樣學樣，甚至有過之而無不及，目的都係吸選票。聽聞九龍社團聯會搞呢啲講座就係想加強新血嘅政治敏感度。
被問到咁咪好容易畀啲無間道參加囉？有關人士就話，唔使驚嘅，因為稱職嘅無間道要經過長時間訓練，先培養到相對嘅心理素質出任呢個職務，依家連培育政治人才都咁難，大家仲邊有心機培訓無間道吖。
