工程開支單單超 施政無能鑊鑊甘

港府最新敗家「傑作」，就係高鐵工程嚴重延誤超支嘞，埋單隨時可能再創「新天價」。斥資近七百億元興建嘅大型基建工程，一場黑雨就搞到甩甩漏漏，已經夠晒核突喇，更核突嘅係，衰嘢曝光，港鐵同港府互扯貓尾鬥卸責，一個賴天賴地賴人手不足，另一個更不知所謂，一句「非常驚訝、意外同失望」就想將失職責任推清光。

仲有斥資過百億元興建嘅八號幹線青衣段，畀審計報告踢爆因路政署工程合約有錯漏，工程延誤十六個月，超支接近兩成。

市民眼睛係雪亮嘅，「東方報業民意調查」結果顯示，對於高鐵嚴重延誤及超支，四成四受訪者狠批政府監管不力；兩成四認為勘探不足，設計欠完善所致；兩成一指當局無能，無法解決人手及技術問題。對於八號幹線工程延誤超支，四成一受訪者批評部門做事粗疏不嚴謹；三成一指當局能力不足，辦事不力；兩成三認為涉及人為疏忽。

審計報告仲披露，當局注資二億五千萬元成立嘅盛事基金，由於監管不力，資助項目帳目不清，創造就業名不副實。「盛事基金」變「醜事基金」，五成六受訪者質疑基金用途變質，浪費公帑；兩成三批評監管鬆散欠全面；一成七直指基金對社會貢獻不大。唉，港府阿茂整餅，搞乜鬼盛事吖，不如將啲錢用嚟扶貧、安老好過喇。

仲有吖，港府成日話房屋政策係施政重中之重，點不知公屋供應又係糊塗帳一筆，長遠房屋策略督導委員會話未來十年要增建二十萬個公屋單位，審計署計嚟計去，實際供應得十七萬九千個咁大把，實際輪候時間由目前嘅三年加到五年，五成受訪者批評政府部門未能協調土地運用；兩成四直指建屋進度不理想；兩成一認為浪費土地資源。

有學者認為，多項基建項目評估預算失準，浪費公帑，影響民生，反映政府監管不力、能力不足，存在管治問題，當局要加強問責，改善施政效率。上述民調亦顯示，四成六受訪者認為要嚴厲執行問責才能改善部門工作效率；兩成五認為須加強施政力度，認為要整頓及改革管治團隊嘅，亦有兩成四。

官僚做嘢洗腳唔抹腳，香港想唔沉淪都難。計太一叮話齋，港府再唔選賢與能，踢走無德無能嘅庸官，衰嘢只會陸續有來，民望只會愈來愈低嘅咋，叮！