香港審計署揭發「盛事基金」監管不周、成效不彰；被資助的機構更涉嫌行為不當、誇大成效及有利益衝突，尤以那個由民建聯小頭目陳鑑林為首的團夥巧立名目嘅「香港龍獅節」，連獲四度資助，擸了五百多萬公帑，至今，仍未清楚交代啲錢銀點用，並有私相授受之嫌，故有人向廉署舉報，徹查當中有無貪腐行騙之醜事！

身為立法會議員的陳鑑林被記者問及上述醜聞時，竟惡形惡相發爛渣咆吼，又不滿的說：「搞呢個盛事，要好有實力啲人至召集到咁多人o架！」意思係在香港武林界中，只有佢團夥的拍檔才有此能力。喂！對唔住，以我所知，在香港，更具實力的武術團體，曾舉辦過更精彩的表演項目，他們無從參與，只不過是被黑暗特權壟斷而已！

若不是審計署踢爆，有份參加上述「龍獅節」的香港武術團體，也不知原來「主辦者」有咁多錢「贊助」的。據知被邀請的武林界朋友，多是想為香港獻一分力，所以，每一棚獅隊（約七、八個人），只象徵式收三至五舊水車馬費。噢！點知原來有人向基金索取的報酬，是按「人頭」計算的！家陣，即有「食夾棍」之可疑也！

表演當日，係由上午九時集合，勞動到下晝三時多才收皮，麵包和水都無供應的，咁被利用，真係「你當佢係兄弟，佢當你係契弟」也！故此，不少師傅有被騙的感覺，話明無下次不特止，仲話要「追數」添！看來，呢單嘢都幾多手尾跟。都話過，做人千祈唔好偷呃拐騙o架啦！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps