高鐵延期通車，嘥公帑失商機，立法會議員自然睇唔過眼，想用特權法調查，不過地下火車高層面無懼色，似早有準備。

議員︰有冇搞錯，你知唔知延遲通車有幾嚴重？

高層︰我哋都唔想，全因一場世紀黑雨所致，最衰都係個天！

議員︰自己做得唔好，仲賴天？

高層︰唔賴天，咁……最衰都係渠務署，唔做好疏通，搞到隧道水浸！

議員︰死不悔改，查，一定要查！

高層︰好呀，我贊成。

議員︰估唔到你面皮咁厚！

高層︰咁大家坐低飲啖「茶」，食個包，有乜嘢唔好呢？

議員︰真係醫番都嘥藥費……

第一手消息請下載on.cc東網iPhone/iPad/Android/Windows Phone Apps