城中鏡：龍舟賽提早練兵 廠商會誓入三甲
好多港人趁住一連四日嘅復活節假期外遊，但中華廠商聯合會青年委員會一班兄弟姊妹，尋日未天光就走咗去赤柱扒龍舟。事緣佢哋喺嚟緊嘅端午節，將會連續第三年參加赤柱龍舟賽公開男女混合賽，記得舊年佢哋僅以零點一秒之差三甲不入，只係得「梗頸四」，眾人事後都覺得相當唔抵，所以今年青委一眾領導不敢怠慢，早喺比賽前兩個月就展開特訓，希望今年可以有獎落袋，為踏入八十周年嘅廠商會增添一份賀禮！
廠商會青委領導（前排左起）黃浩鈞、張永鴻、吳景瀚，同埋（後排左起）林蘭詩、劉子芸、王詩雅及顏明秀。
地獄式特訓開始前，一眾廠商會青委喺赤柱正灘拍攝大合照。
廠商會青委去年龍舟賽只得「梗頸四」，今年提早特訓誓要有獎落袋。
廠商會青委尋日喺主席張永鴻、同埋六名副主席吳景瀚、顏明秀、劉子芸、黃浩鈞、林蘭詩同王詩雅等人帶領下，一大清早就到咗扒龍舟勝地赤柱正灘集合熱身，見佢哋扒龍舟時齊上齊落，節奏同速度都有一定水準，睇得出佢哋真係下過苦功。擁有逾六年扒龍舟經驗嘅領隊兼教練胡子岐分析，各位隊員平日因工作太忙，缺乏運動，必須喺體能方面加以提升先有勝算。
女仔扒龍舟 皮膚都靚啲
多名女副主席落力投入特訓外，除咗想攞獎，另一原因係希望借扒龍舟減磅美容。其中王詩雅透露，好多人以為女仔扒龍舟會搞到對手粗晒，又擔心曬得多好容易會出雀斑，但其實多做運動有助身體機能加快運轉，有助減磅之餘，連皮膚都可以靚啲。
正所謂三軍未動，糧草先行，見到班年輕人咁支持個會，據聞廠商會會長施榮懷同多名副會長，亦一如以往咁喺背後出錢出力，資助佢哋嘅一切飲食同其他經費開支，但落場扒龍舟呢啲粗重嘢，都係留番畀班年輕人嚟喇！
