政壇：搞搞政：面對爛騷攞威 鬍鬚曾想爆粗？
立法會大會上周三二讀撥款條例草案期間，財爺鬍鬚曾再次畀社民連「長毛」梁國雄掟陰司紙時，就罕有地爆咗一句「行開啦！」回敬對方。尋日佢喺網誌中，自爆喺紐約街頭長大，曾經用「助語詞」對付啲欺善怕惡嘅挑釁者。唔知下周預算案拉布戰正式開打時，佢會唔會成為首位喺立會公然爆粗反鬧議員嘅高官呢？
設計圖片及對白
叫人豬頭炳 會畀父母鬧
鬍鬚曾喺網誌自爆，當年喺美國讀中學時，課餘鍾意同朋友喺紐約街頭玩，早已見慣各式各樣衝突。對於嗰啲表面上睇起嚟好惡，但實際上就剩係識得揀一啲明知唔會反抗嘅人嚟找麻煩，藉以「展示實力」，自己好安全咁喺街坊面前「做騷」攞威嘅人，佢就特別反感，好明顯係諷刺緊班激進泛民議員。
佢又話遇到呢類麻煩人，佢大部分時間都會忍咗就算，任佢「演完嘢」、「做完騷」之後就離開，但當有時同一類型嘅「爛騷」，一而再、再而三重複上演，啲街坊難免感煩厭，唔等場騷做完，自幼學武嘅佢，就會伸手推開對方，好斯文咁講句「Go Away（行開啦）」。如果對方仲要糾纏落去，有時佢都要加上一句「意思相同，但更直接、更能表達立場嘅『助語詞』」，即係爆粗嚇番對方。
大家睇到呢度，梗係以為鬍鬚曾經已畀連串激進泛民嘅挑釁言行「谷到爆」，預告稍後會公開向長毛爆粗，為嚟緊可能長達個多月嘅拉布爛騷，增添多少火藥味同新意。不過，佢喺網誌尾段又「兜番」，話佢父母當年一直嚴禁自己對任何人講不敬說話，即使叫人做「豬頭炳」都一樣會畀父母鬧，所以佢對於任何不禮貌嘅挑釁，「一句簡單嘅回應，也總算得體」，即使對方心懷惡意，其他助語詞亦可免則免，想睇戲嘅市民可能要失望喇！
