王小玲
除咗鍾意做善事之外，詠藜園董事長楊王小玲原來仲有收藏藝術品嘅興趣。尋日佢出席一個藝術品拍賣活動時話，其實佢競投同收藏藝術品，到最後都不忘行善，多次將啲心頭好捐番出嚟，將籌得善款用嚟做善事，希望盡一分力幫到有需要嘅人。不過，尋日佢就喺拍賣會上空手而回，少咗將來一個做善事嘅機會。
王小玲透露佢之前曾經投得滿清皇室之後、愛新覺羅啟驤嘅畫作，呢幅畫對佢嚟講別具意義，皆因佢夫家嘅祖先係清朝御廚，即係幫過愛新覺羅啟驤嘅祖先煮飯，如今機緣巧合之下，成為咗對方畫作嘅買家，實在非常難得。佢投得有關畫作後，特登請咗愛新覺羅啟驤夫婦食飯，一嘗當年佢哋祖先最愛食嘅御膳「雲白肉」同慈禧素菜宴。
佢又預告再過兩星期，佢哋就會開始發售以前滿清皇族御用、分別以鹹肉及紅豆製成嘅「皇爺糉」同「太妃糉」，當中八成收益會撥捐慈善機構榕光社，希望可以幫啲獨居長者改善生活。
第一手消息請下載on.cc東網
