政壇：徐英偉一家四口遊濕地

呢幾日係復活節假期，民政事務局政治助理Caspar徐英偉，尋日同太太及兩個囝囝去咗濕地公園享受家庭樂，仲好罕有咁將一家四口嘅合照，放上社交網站同大家分享。Caspar自爆，由於工作太忙，對上一次家庭日已經係舊年年底，今次家人提出想參加本地遊，適逢濕地公園尋日有復活節活動，於是就一家四口去玩足全日。

徐英偉（左）一家四口暢遊濕地公園，細仔似乎鍾意隻招潮蟹公仔多過個鏡頭。（互聯網圖片）

尋日天氣和暖，間中更烈日當空，Caspar一家早就做足防曬同防蚊措施，佢仲特登揀咗對鮮黃色嘅波鞋着，襯番兩個囝囝件黃色衫，真係睇見都幸福。