政壇：林健鋒監管不力勢被踢走
近年盛事基金多次捲入風波爭議，最新一次係被審計報告踢爆成效不彰，基金評審委員會主席Jeffrey林健鋒更被批評監管撥款不力，由於Jeffrey嘅任期將於今年六月屆滿，理論上未超過不成文嘅「六六規定」，即不超過同一公職六年任期，同埋同一時間加入不多於六個委員會，但相信連串風風雨雨後，即使Jeffrey有心想收拾呢個「爛攤子」，相信呢個主席位都係無得留低居多嘞！
設計圖片及對白
盛事基金嘅設立源於「貪曾」前特首曾蔭權爵士，因應金融海嘯，本港百業蕭條，因此○九年從庫房撥出一億元成立盛事基金，諗住可以「激活」本港旅遊業，當時委任Jeffrey做主席，為期三年，即至二○一二年六月屆滿。
差不多喺同一時間，貪曾政府向盛事基金再揼水一億五千萬元，讓基金延長運作五年，即至二○一七年，隨後再度委任Jeffrey做主席多兩年，即至今年六月中屆滿，到時前後將出任基金主席多達五年，殊不知其主席任期快到屆滿之際，基金就被審計署萬箭齊發批到體無完膚，立法會政府委員會話要公開聆訊，更加有政黨喺日前去廉政公署舉報，要求調查基金資助嘅國際龍獅節係咪涉嫌欺詐，認真係人算不如天算。
誰願接手成疑問
雖然基金依家搞到一鑊粥，消息指短期內唔會「摺埋」，換言之好大機會要繼續運作落去，不過，基金評審委員會大換班相信事在必行，因為Jeffrey等六人連續做咗五年，加上今次搞出個「大頭佛」，基金亦需要更多新思維去更謹慎監察撥款過程，因此外界要求換人呼聲愈來愈高，然而一旦Jeffrey離開主席一職，究竟邊個願意在風高浪急之際成為基金「新掌舵人」？就要睇吓有無人有迎難而上嘅政治勇氣嘞！
