東網電視
更多新聞短片中華廠商聯合會（廠商會）年底舉行換屆選舉，會長爭奪戰一度風起雲湧，但近日有傳敲定由第一副會長Shirley陳淑玲接棒，風波終告平息。咁啱廠商會尋晚喺灣仔會展中心舉行八十周年晚宴，會長施榮懷率領一眾副會長同會董出席，當中包括早前傳出嘅會長熱門人選Shirley、第二副會長李秀恒同副會長顏吳餘英。不過現場所見，就唔多覺顏太同李秀恒有企埋一齊，只係各自滿場飛去同在場老友打招呼。
施榮懷（右二）、副會長吳永嘉（右一）、徐晉暉（左一）同行政總裁黃靜文齊碰杯慶祝廠商會八十歲生日。
李秀恒話並冇為競逐會長一事唔開心，仲讚陳淑玲係會長好人選。
顏吳餘英（右）話好支持陳淑玲（左）競逐廠商會會長一職。
對於Shirley決定重新參與競選會長一職，顏太話好支持好姊妹Shirley嘅決定，兩人仲喺晚宴上開心合照，力證二人之間並冇芥蒂。至於對呢件事一直未表態嘅李秀恒，就首次表明自己並冇唔開心，仲話Shirley都幾好，係一個好好嘅人選咁話，兩人尋晚仲有握手添，但佢就唔想評論早前嘅會長爭奪戰嘞。至於Shirley嘅堂哥、永遠名譽會長陳永棋就話邊個做會長都唔緊要，大家都係一心想為廠商會出一分力啫。乜真係邊個做都冇所謂？
「四大天王」放笑彈
講番廠商會晚宴，除咗邀請高官出席外，一班廠商會成員仲齊齊表演，以話劇形式表達香港經濟喺八十年內嘅轉變。負責籌備同撰寫劇本嘅李秀恒話，今次表演係大家花咗半年時間同心血去準備，表演成功真係感動到想喊，非常感性。此外，常務會董沈運龍同史立德、會董白富鴻同餐飲服務業行業委員會主席符策雄，就分別扮演當年嘅「四大天王」，相當搞笑。
第一手消息請下載on.cc東網
