設計圖片及對白
《基本法》規定修改特首同立法會產生辦法，必須得到立法會全體議員三分之二多數支持，以七十名議員計算，即係要四十七票，扣除一般唔會投票嘅立法會主席曾鈺成，並假設餘下四十二名建制派議員全數「歸隊」，政府最少仲要有五名泛民主派議員「轉軚」支持，先有望通過一六同一七年政改方案，落實特首普選。消息指出，經過早前上海之旅，有關方面發現依家實際只擁有四張泛民鐵票，仲差一票先至夠數通過，形勢仍然緊張。
瞄準民協馮檢基
消息指出，一向被視為「隱形」建制派嘅衞生服務界李國麟同資訊科技界莫乃光，同埋講過寧願退黨都要爭取落實普選嘅公文袋湯家驊，能夠抵住壓力、堅持參與晒整個訪滬行程，可被視為有望支持今次政改嘅「鐵膽」。至於同莫乃光同屬公共專業聯盟成員嘅會計界梁繼昌，雖然並無參與晒整個訪滬行程，但有說佢同莫乃光只係策略性分道揚鑣，以免咁快被人睇死佢哋遲早會「轉軚」。喺日前嘅財政預算案二讀投票，以及再之前嘅擴建堆填區撥款申請，佢哋都喺泛民一遍謾罵聲中雙雙投咗贊成票，令人覺得兩人「有得傾、靠得住」。
最後一票喺邊度搵呢？據聞有關方面仍寄望緊民協KK馮檢基，認為佢純粹因孭住泛民飯盒會召集人個包袱，先會喺訪滬中「扮激」，相信隨着召集人任期喺今年暑假後屆滿，KK會回復理性。不過，亦有意見認為，如果白鴿黨今次企硬反對政改，KK畀個膽佢都唔敢獨自「轉軚」，否則民協就會成為激進派嘅唯一狙擊目標。
第一手消息請下載on.cc東網
