菲洛（右）同楊致遠（左）喺一九九四年齊創辦雅虎。（資料圖片）
雅虎將會喺六月底舉行周年會議，選出新嘅董事會成員，喺雅虎公布嘅候選人名單裏面，發現雅虎創辦人之一菲洛（David Filo）個名﹗菲洛今次闊別雅虎十八年後再爭取重入董事局，如果成功，唔知公司會唔會再有一番新景象？
一九九四年菲洛同楊致遠一齊創辦雅虎，唔講唔知，原來一開始個搜尋器叫「David and Jerry's Guide to the Web」，到後來愈做愈大先改名做「Yahoo!」。不過菲洛九六年就放棄咗董事局個位，直至今年，以四十七歲之齡，重新提名入局。雖然雅虎係佢嘅「親生仔」，但都唔代表佢一定會當選，事關另外兩位競爭對手嘅來頭一啲都唔細！
其中一位係美國低佣金經紀公司嘉信理財嘅創辦人Charles Schwab，另一位就係美國超市龍頭沃爾瑪嘅前行政總裁H. Lee Scott Jr.，依家雅虎行政總裁邁耶同樣係沃爾瑪嘅董事局成員，分分鐘有得加分都唔定﹗之不過，即使入唔番董事局，菲洛都仍然係雅虎嘅大股東嚟嘅。
第一手消息請下載on.cc東網
