政壇：劉燕卿唔吼跨國企業 寧做申訴專員
今個月初上任申訴專員嘅Connie劉燕卿尋日同傳媒聚會時，大爆自己卸任消費者委員會總幹事後，其實獲得唔少跨國企業集團賞識，向佢招手，中國企業又有，美國企業都有。不過，就算呢啲企業幾咁大規模，佢都不為所動，直至申訴專員公署邀請佢參加面試，佢就一口答應。點解Connie有跨國企業唔做，偏愛申訴專員公署？係咪對個市場有乜隱憂呢？
設計圖片及對白
簡化處理投訴方法
Connie話做申訴專員任重道遠，好有意義，而相比消委會，雖然兩個機構都同樣係一個監管機構，幫市民解決問題，但申訴專員公署嘅權力就大好多，佢依家上任近半個月，感覺良好，同團隊一齊做事亦覺得好暢快。
佢仲好開心咁分享家事，話長居北京嘅囡囡近日經已返港待產，預產期喺六月，不過囡囡好支持佢擔任呢份新工作，所以寧願媽咪返工都唔使陪伴左右。似乎Connie做呢份新工，真係無後顧之憂嘞！
至於提到公署未來工作目標，Connie就話主要有四個展望，包括簡化處理投訴方法，如果係啲唔嚴重嘅個案，署方就會多採用要求相關政府部門直接向投訴人解釋嘅方式，但如果遇到涉及行政嚴重失當嘅問題，署方都係會全面調查，並要求有關當局交代。
佢話公署當然亦會繼續審研一啲關乎大眾利益，又比較宏觀問題進行主動嘅調查，另外亦會多以調解解決投訴嘅個案，以及會舉辦講座，向政府部門解釋調解嘅好處，同調解與仲裁嘅不同之處，多啲同持份者溝通。
藉着今年係公署二十五周年，佢話會製作宣傳短片同講座，介紹公署嘅工作。
