宿舍丟空十幾年 港產官僚真敗家

審計署最新報告踢爆，政府現有七百零八個高級公務員宿舍，當中一百九十八個屬於「過剩單位」，加上五個政府部門合共持有四百九十八個未用過嘅宿舍，即合共有六百九十六個宿舍單位無人住，當中淨係水務署就佔咗三百三十個，部分單位甚至已經丟空十五至十七年，嚴重浪費土地資源。

當局話喎，九○年實施居所資助計劃後，新入職公務員無資格申請高級公務員宿舍，需求日漸下降，先至有咁多宿舍丟空。其實就算係咁，都不能成為浪費資源理由o架。家陣房屋問題嚴重，當局面對地從何來嘅困境，既然咁多公務員宿舍無人住，點解唔將地皮交畀政府呢？就講水務署轄下嗰三百幾個宿舍吖，唔少位處市區黃金地段，只要政府將物業拆卸重建，既可增加庫房收入，又可增加房屋供應，何樂而不為呢？

審計署就講得啱嘞，產業署應該協助部門善用資源，盡快出售空置物業。計太一叮話齋，處理空置宿舍一啲都唔難，出售又得，出租又得，拆卸亦得，難就難在官僚唔上心啫。試諗吓，如果宿舍係官老爺嘅私人物業，佢哋會唔會長期丟空養蚊吖？

公務員宿舍本來係珍貴資源，弊在港產官僚闊佬懶理，任由宿舍丟空，又唔拆卸重建，又唔出租創收，結果咪變成政府嘅財政負擔囉。淨係過去一年，產業署就用咗三億五千幾萬元管理宿舍，納稅人簡直冤哉枉也。

話時話，港府部門暴殄天物，浪費土地資源嘅例子多如牛毛，又點止空置宿舍咁簡單。譬如食環署旗下公共街市十室九空，又譬如港府將大量土地廉價甚至免租批畀私人會所，專供富豪享樂，當中淨係一百七十公頃嘅粉嶺高爾夫球場，已經足夠起十萬個住宅單位。港府有現成土地唔用，反而挖空心思四處搵地，結果搞來搞去得個吉，仲被人批評盲搶地，簡直自取其辱。

無殼蝸牛望樓興嘆，而政府就有大把宿舍空置，你話係咪荒謬吖。審計署都話嘞，因為拓展土地進度緩慢，預計房屋署未來十年最多只能興建十七萬個公屋單位，不但滿足唔到市民需要，連長策會十年建廿萬公屋嘅保守目標都達唔到。港產官僚沉香當爛柴，指望佢哋解決房屋問題，嘥氣啦，叮！