城中鏡：魏華星 何稼楠話當年
城市大學尋晚舉行傑出校友頒獎禮，社會企業Green Monday創辦人Francis魏華星、做家電嘅科匯工業董事總經理何稼楠齊獲殊榮。Francis回憶當年報考大學時，成績麻麻，原本家人已打定輸數送佢到海外升學，佢阿姨仲幫佢買埋枕頭添！估唔到後來城大收咗佢先唔使離鄉別井，仲喺城大認識咗佢人生中好重要嘅一個人，就係佢太太喇！
魏華星（箭嘴示）獲頒城大傑出校友，太太同一對仔女等親友齊去打氣。
何稼楠（右）喺陳瑞球手中接過獎座，兩位工業家惺惺相惜。
葉少康喺《三十而立》書中分享克服殘障、力爭上游嘅心路歷程。
城大新書《三十而立》，由三十位校友分享成功之路。
Francis獲得母校肯定，心情好興奮。佢父母、太太同一對仔女，同埋佢口中嘅「枕頭阿姨」都有到場為佢打氣。佢笑笑口表示，由於城大收咗佢，所以嗰個枕頭一早已經不知所終。見佢行路要用拐杖，唔知有乜事呢？熱愛長跑嘅佢就話因跑步跑得太多，膝蓋移位，依家睇緊中醫調理。
新書分享30校友成功經驗
至於何稼楠就好有心，唔止經常捐錢畀母校，仲時刻掛住提攜城大學弟學妹，依家仍然同學校合作，致力做好創意工業。佢話自己做家電唔同人哋鬥平、鬥多，專走高增值路線，所以唔使到外地設廠，最終令香港社會得益。佢喺慈善家兼工業家陳瑞球手中接過獎座，零舍開心。
城大話咁快成立三十周年，校方趁機推出一本新書《三十而立》，由三十位城大校友分享成功之路，包括○八年殘奧會香港馬術代表葉少康同環境局副局長陸恭蕙等人。葉少康力爭上游嘅故事夠晒勵志，年輕人多啲聽吓佢嘅故事，相信會有得着。
