新一屆區議會選舉明年舉行，相信多數政黨都想擴闊版圖，派多啲人參選，點知富貴黨就打倒褪，打算縮細選舉規模，決定只派十幾人出選，較上屆大幅減少。該黨作為中小型政黨，但竟然喺一一年區議會選舉中派出二十四名議員參選，而且戰線遍布全港五大選區，令人手資源調配極之困難，最終選舉輸到一仆一碌，莫非該黨經此一役嚇窒咗？定係有其他原因呢？

設計圖片及對白

避免火頭愈辣愈多

富貴黨近年積極打造「曳仔」形象，已經腹背受敵，據聞該黨都唔想完全得罪「操盤人」，所以初步打算盡量唔喺建制派嘅選區搶位，主力同泛民票倉對撼或開闢新區出選。該黨亦決定唔再漁翁撒網，將資源集中喺十幾個中產選區，尤其主打港島私樓密集嘅中產區，希望力保本身議席之餘，期望能夠建立多幾個港島區樁腳。

其實，建制派內部除咗主要嘅大黨外，主打中產嘅新民黨冒起亦相當急速，頻頻喺各區招攬現有區議員入黨，早前更與沙田地區政團公民力量結盟，令區議員人數增至三十一人，實力不容忽視。所以有地區人士分析，即使富貴黨好似一一年區選咁派人四出參選辣火頭，相信只會重蹈覆轍，慘敗收場。

第一手消息請下載on.cc東網iPhone/iPad/Android/Windows Phone Apps