話說五十多名立法會議員上星期訪滬兼討論政改，今次擺明係要建制派議員做人肉布景板，但同屬建制派嘅勞工界議員Bill鄧家彪就因為生咗粒大粉瘤要做手術，因而避過呢項任務。話說阿Bill兩個星期前左邊後腦突然生咗粒大粉瘤，仲發到乒乓波咁大，醫生話佢頭皮毛孔閉塞，令皮膚分泌受阻，所以「谷」到咁大喎！

鄧家彪兩星期前後腦生咗粒大粉瘤，上周已做手術切除。

醫生於是開咗啲抗生素畀阿Bill，但佢食咗藥之後淨係止到痛，粒粉瘤都係冇變細，搞到冇覺好瞓，所以就決定上周三做切除粉瘤手術。佢話做完手術第二日已可出院，原本仲諗住可以如期去上海，但醫生提醒，萬一傷口受感染就麻煩嘞，所以都係建議佢留港休息。佢最後都聽醫生勸喻，向秘書處請假唔去上海，乖乖留喺屋企休息。

但最搞笑嘅係，阿Bill啱啱做完手術時，個頭包晒紗布，好似木乃伊咁款，搞到囡囡都畀佢嚇親喎！尋日佢去立法會開會時，後腦仲貼住塊大紗布，睇落都幾礙眼。

第一手消息請下載on.cc東網iPhone/iPad/Android/Windows Phone Apps