政壇：ACGA報告激親李小加
早前港交所行政總裁李小加有關同股同權嘅網誌，引用港交所本身做例子，話同股同權都有例外時，搞到政府有啲意見。估唔到今次風水輪流轉，輪到小加畀人激親。話說ACGA（亞洲公司治理協會）日前發表咗一個關於同股同權嘅調查報告，其中一條問題，叫被訪者就港交所、證監會同政府喺處理阿里巴巴來港上市一事上評分。結果，港交所喺三個機構中表現最差，更有百分之二十八回應者話港交所在事件上表現差。
李小加尋日被問到有關調查時都有少少動氣，話點解唔加埋紐約證券交易所、美國證交會等叫人評分，話咁樣先夠客觀全面。
有口痕友就話今次個調查，好明顯係衝着港交所而來，一來ACGA過往冇做開呢啲調查，二來問題頗針對性喎！
其實阿里巴巴單嘢真係好多人熱議，尋日連港交所小股東都好關心，喺股東會上就有人問阿里單嘢，港交所主席周松崗就話本港有《上市規則》，公司必須符合規則才能上市。如有特別要求，港交所亦無能為力。同時，港交所若果要改變上市規則，必須要經過長時間諮詢，同埋要有市場共識才可以做。小加總裁就承認事件已過咗一段長時間，但現時有關不同股權架構諮詢仍未有進展。
