政壇：貪曾冇面拍元創方短片？
前荷李活道已婚警察宿舍活化成嘅本地設計新地標「PMQ元創方」創意產業中心，今個星期開始局部開放。為配合建築物的歷史價值，元創方除咗將舊宿舍單位活現眼前外，仲播放咗一段由舊居民憶述當年生活嘅宣傳片，其中一位居民正是特首CY梁振英。不過，同樣係宿舍舊居民嘅「貪曾」前特首曾蔭權就冇登場，唔通驚佢嘅貪腐醜聞，會影響元創方嘅形象？
元創方公關解釋，佢哋有邀請貪曾拍攝宣傳片，只係因為貪曾喺拍攝期間唔喺香港，所以無法成事。咁又係，貪曾嘅「貪盡海陸空、歎盡省港澳」貪腐醜聞臭名遠播，已變成過街老鼠，所以佢經常離港「潛水」，其實佢唔拍好過拍啦，以免破壞宿舍舊居民嘅美好回憶。
至於有參與宣傳片嘅CY，喺片中身穿充滿懷舊色彩嘅MARK哥大褸，親身到宿舍憶述佢細個嘅居住情況，佢形容當年宿舍單位細，食飯要在走廊開枱，一路食一路凍，但就好有人情味。另外，其中一個展覽廳布置成以前宿舍單位模樣，擺放酸枝長椅、衣車及印有當年紅極一時嘅前港姐狄寶娜摩亞肖像嘅年曆掛畫，營造昔日家居氣氛。
