政壇：訊息亂發 盧偉國露底
依家時興用智能手機WhatsApp溝通，但建立群組太多，自然花多眼亂，傳錯訊息嘅機會亦會增加，好似立法會工程界議員WK盧偉國就擺咗個大烏龍。
設計圖片及對白
盧偉國訊息內容。
話說立法會工務小組委員會尋日討論擴建將軍澳堆填區及興建石鼓洲焚化爐計劃撥款申請。喺會議開始時，WK就決定將政府有關三堆一爐嘅建議合併討論，並喺表決時先至分開投票。不過，呢個安排就引起部分泛民議員不滿，陳偉業（大舊）認為，兩者係獨立事件，質疑WK意在幫政府加快審批，做法偏頗。WK反駁話呢個安排只係因為覺得三堆一爐係整體策略，所以議員毋須懷疑佢嘅動機。
指有立場合理
就喺呢個時候，范國威就攞出手提電話，話上月召開環境事務委員會會議當日，WK就傳咗個訊息去秘書處開設畀全體委員嘅群組，短訊內容係：「今早要投票三堆一爐，建制派要夠人至得！」證明WK主持會議有欠持平。大舊亦批評WK作為工務小組委員會主席嘅公正性已蕩然無存。WK就反駁話自己作為環境事務委員會委員，梗係有自己嘅立場，但依家作為工務小組委員會主席，就會好中立咁主持會議。
場內開戰，場外都有富貴黨「田少」田北俊同前黨友西貢區議員「哪吒」方國珊大鬥法。哪吒喺會議前聯同二十多名將軍澳區居民到達立會門外請願，要求政府永久關閉該區堆填區。點知喺佢哋請願期間，田少同該黨另一議員易志明亦帶同十多名黨員踩場。
田少當正哪吒冇到咁企喺佢面前話，會支持將軍澳居民，反對擴建堆填區。田少講完就即刻擰轉身，話要趕去開會，搞到哪吒想回應都嚟唔切，惟有大聲話反對堆填區係富貴黨競選承諾，希望田少信守呢個承諾喎，哪吒今次似乎輸咗個勢囉！
