旅遊推介變老點 吸客不成反趕客

旅發局係推廣香港旅遊嘅唯一官方機構，官網上有大量對香港特色美食、旅遊景點嘅推介，本來呢，咁做既可推廣本港優質景點同食肆，又可方便旅客按圖索驥，一家便宜兩家着。可惜官老爺魂遊太虛，連推介咁簡單嘅事都做唔好。嗱，有廣州旅客跟住旅發局網頁推介，一心來港光顧灣仔一間法國餐廳，點知嚟到先至發現法國餐廳早已執笠，變成一間意大利餐廳。咁仲未止，呢位旅客跟住光顧尖沙咀一間海鮮火鍋店，可惜火鍋店早就關門大吉，連招牌都改埋。旅發局網頁一錯再錯，指南變老點，旅客唔一肚氣就假咯。

話時話，旅發局嘅烏龍嘢又點止咁少吖。本報記者根據網頁資料，走訪十多間旅發局推介嘅食肆，發現問題多多，既有食肆變成鞋舖，又有酒樓正在裝修，如果旅客專程而來，肯定失望而回。好嘞，就算店舖仍然健在，網頁標示嘅價錢亦未能與時並進，好似筲箕灣一間小食店咁吖，一碗三溝碗仔翅賣十七元，但旅發局仍然標示Ｎ年前嘅舊價十四元，旅客嚟到分分鐘以為食肆坐地起價添呀。

唔怪得有立法會議員批評，旅發局係官方機構，具有公信力，竟然提供錯誤資料誤導旅客，唔止影響食肆生意，仲損及本港旅遊業形象，完全不可接受。最好笑嘅係，旅發局收到本報查詢仲夠膽死撐話，網頁有定期更新機制，食肆資料一般三個月更新一次，之所以出現錯漏，可能因為食肆數目太多，變動太快喎。乜嘢叫官字兩個口，大家有眼睇嘞，旅發局賴天賴地，完全唔識自我反省。

即係咁，依家係訊息時代，乜都講究快，講究及時，旅發局網頁三個月先更新一次，有冇再慢啲呀。旅發局每年花費嘅公帑不少，結果連區區一個網頁都搞到錯漏百出，貽笑大方，吸客不成反趕客，點講都講唔通。旅發局自己出醜事小，影響旅客興致，破壞香港旅遊形象事大。

旅發局廣告都有話喇，「今時今日咁嘅服務態度點得o架」，唔該旅發局醒醒定定，以身作則，咪有口話人冇口話自己。如果旅發局仲唔知恥近乎勇，拿拿臨更新網頁，咁政府就應該更換官僚嘞，叮！