城中鏡：劉智傑秘藏「賽馬易筋經」

劉Sir由紅褲子出身升做滙豐首位華人副總經理，絕對唔係靠運氣，係靠多年努力。呢樣嘢同佢買馬真係同出一轍。之不過，劉Sir係從失敗中學習，將多年買馬經驗，親筆抄低成為一本「賽馬易筋經」，絕對唔差得過少林寺嗰本。

講起呢本經，佢笑到咔咔聲話：「我自己寫去提醒自己之嘛，其實係一本筆記，去提醒咗我賭馬唔好再犯同一個mistake，其實賭馬又好，炒股又好，你唔記得你一衝動又會再錯，所以久唔久要睇番吓 ，唔好重犯，你犯錯少咗已經輸少咗啦。」

但令人更O嘴嘅係，佢仲搵人研發咗三個賽馬用嘅軟件，增加贏馬嘅概率，但佢話軟件係自己用，送畀人都唔識用。劉Sir有易筋經，又有軟件，簡直係現代嘅武俠。