新世界發展執行董事Adrian鄭志剛同一班前輩同場,大談新媒體發展,主持話要由老人家講先,Adrian最後生,當然排隊尾。佢一揸咪,忽然爆咗句:「我年齡上係最後生,但精神年齡可能係最老嗰個。」

鄭志剛

原來佢話自己唔用手機或平板電腦睇新聞,主要都係睇報紙,「你唔使睇網上即時,啲朋友喺WhatsApp、facebook時已經有最新資訊啦,同埋我Enjoy睇到報紙上個排版,知道新聞個重要性。」

Adrian老竇「純官」鄭家純咁啱喺第二個場合講起類似話題,答案同阿仔好唔同喎。依家網購成行成市,好多傳統零售公司近年都大力發展電商渠道,周大福就係其中之一。純官話自己冇網購,因為佢唔識,仲話連Wechat同WhatsApp都唔識用,要搵人就直接打電話!

純官話send個訊息畀人,要等人回覆太麻煩,打電話就最快最直接喇!對於現時科網股咁火熱,佢都話因為自己唔熟悉呢樣嘢,唔會做相關嘅投資咁話。

講番周大福嘅發展,純官就話公司上市至今兩年幾,當初作出一啲承諾,依家都按部就班進行緊,只不過過程中受到市場及經濟因素而有阻滯。佢仲透露,現時集團擁有超過二千間店,十年後增加到四千間都冇問題。

第一手消息請下載on.cc東網iPhone/iPad/Android/Windows Phone Apps