城中鏡：美女廚房 賢慧有心思
事業型嘅女性，除咗出得廳堂之外，仲要入得廚房，香港青年聯會賢慧社召集人Dorothy周沁早前約埋班好姊妹大玩「美女廚房」，學煮意式同法國大餐。
賢慧社一眾女將齊玩「煮飯仔」，樂在其中。前排右起周沁、馬善恒、林玥彤、陳穎妮及Valen，後排左起Edith、Jenny同林海容。
周沁調製自家雞尾酒，有板有眼。
香煎鵝肝
外脆內軟，試過就知好食。
海鮮意大利飯
蝦汁鮮味滲入每一粒飯，色香味全。
Dorothy號召，賢慧社十多位成員立即齊響應。佢哋全部係事業女性，平時入廚機會唔多，講到烹調高級西餐，更加係門外漢。咁蹺有老友借出廚藝中心，姊姊們即興上番堂家政，搵嚟大廚傳授秘技。
大家一睇菜單，就知一啲都唔簡單。一晚要學識整焗薯仔湯、香煎法式鵝肝、海鮮意大利飯、香草煎三文魚、焗黑毛豬柳，仲有法國頂級甜品薑汁梳乎厘，認真考功夫。大廚細心講解烹飪步驟，包括如何處理食材、入廚竅門等，講完一輪，就到時間實習吓。眾人捲起衫袖着上圍裙，拎起鑊鏟炒呀炒，愈煮愈興奮。
周沁炮製特色雞尾酒
平時愛煮幾味嘅Dorothy更大顯身手，親自炮製一杯名為「Dor Dor special」嘅雞尾酒，味道清甜潤喉。秘訣好簡單，就係將一份白酒加十分一紅梅果漿，再加冰搖勻就搞掂。煮得咁辛苦，大家一於飲番杯。呢個時候，佢捧出一盤梳乎厘，點知唔夠三分鐘，梳乎厘就塌晒，嚇到班姊姊扁晒嘴。大廚解釋話蛋白分量未控制得好好，嚟緊上多兩堂課就掂晒。
