乜嘢係叫做「法治」呢？在十七年前，我一定識答，而且答案會得到「肯肯定」的！今天，我一定唔識答，即使答得出，也不一定答得對！大家睇吓：關乎香港經濟命脈的「滬港炒股通」，居然可以係大陸單方面突然宣布，話有就有，事前，連向港方「單一聲」也無需要。

香港財政司司長以「大件事」為題，話中國總理李克強突然推「滬港通」出台，財爺也是突然「被通知」米已成炊，所以，呢幾日港股有點大亂囉！

今劑滬港兩地股市「互聯互通」，實屬屁話，淨係睇兩地嘅監管制度，並無統一機制，已是荒謬絕倫啦！點可能雙方協議下的同一件貨、同一價錢，卻沒同一合法性的對等法制監管。喺大陸，中央政府隨時有權話點做就點做都得喎！

香港地區，要尊重中央「一國」大於「兩制」的基本原則，否則，就係唔認識國家立法原意，兼且，仲會傷害國內同胞嘅感情！

呢個乜乜「滬港通」，唔好講「法律問題」未解決，就係連「執行方法」也無人說得清楚，便倉卒推出，反映大陸財金官員對世界經濟運作，仍處於低B自閉的階段，仲沉迷自誇改革開放成功三十年的經濟強國身份添！或許，佢哋知訂嘅！只不過特登咁做，係另有目的，唔畀你香港人知啫！中國有歷史記錄以來，都係「人治」社會，係君權專政的天下，大部分人民但求能有溫飽，便衷心感謝龍恩的了！知咁多，有得分咩？

話說回頭，今天的「法治」定義？好簡單，就係「中央永遠是對的」！點話點好囉！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

第一手消息請下載on.cc東網iPhone/iPad/Android/Windows Phone Apps