政壇：搞搞政：立會訪滬團驚現「兩支槍」

喺啱啱結束嘅立法會訪滬團，班泛民議員除咗攜帶大批同「六四」有關嘅示威物品，以及畀國務院港澳辦主任王光亞寸做「贋品」嘅「三軌《基本法》」之外，原來佢哋仲帶咗「兩支槍」去上海，兼且成功突破當地海關嘅嚴厲安檢入到境，到臨出境時先畀人發現！咁激？呢「兩支槍」其實係指泛民會計界議員梁繼昌。

建制派議員Ann蔣麗芸前日返到香港之後，喺社交網絡分享咗訪滬團一段趣事。事發喺周日晚嘅機場候機室，工作人員向一眾等待上機嘅團友，逐個嗌名派發登機證，期間眾人突然聽到對方大叫「兩支槍」同「兩美分」，令原本已經攰到東歪西倒嘅議員突然間醒晒，以為有邊個咁大膽帶咗兩支槍入境。

大家諗咗幾秒之後，先陸續意會到工作人員講緊嘅，其實係泛民議員「梁繼昌」同埋建制派議員「梁美芬」，繼而哄堂大笑。

不過，阿Ann未有透露呢位工作人員究竟係廣東話人扮講普通話出事、定係普通話人扮講廣東話出事。