政壇：重量級二代組青年組織
香港各大親中社團、專業團體近年陸續成立青年委員會，打正旗號去做好人心回歸工作，連一班城中二代都打鐵趁熱宣布會喺五四青年節當日成立新嘅青年組織。
聯會核心何猷啟（左起）、曾智雄同蔡加讚。
霍啟智
據聞呢個新嘅青年組織叫做香港政協青年聯會，尋日一批核心成員同傳媒聚會，包括候任主席曾智雄、候任會長「玩具大王」蔡志明兒子蔡加讚，同埋多名副會長，其中較受注目係已故前全國政協副主席霍英東三子霍震宇嘅兒子霍啟智、「賭王」何鴻燊三房陳婉珍兒子何猷啟等，都係城中商界重量級名門之後，然而部分人喺政界方面稍欠歷練也是事實。
期間唔少傳媒都對多名城中二代好有興趣，連番提問都係想佢哋「開金口」，但到最後都係由「超齡」青年代表、現年五十三歲兼同傳媒有「打交道」經驗嘅曾智雄出手幫後輩擋駕，侃侃而談聯會成立組織，以及最近熱議嘅政改話題。
曾智雄首先開宗明義講到聯會成立目的，係創造平台畀青年人理性討論，否認聯會成立有政治目的，甚至同近年中港矛盾、有青年人高舉龍獅旗甚至闖入軍營有關，其後更以個人身份講到政改，《基本法》已經對政制發展有明確規定，相信大部分人嘅睇法都係無公民提名，但同時部分人對無公民提名會有睇法，隨後仲開火批評唔少政客係為做而做。
蔡加讚則話自己同中央官員心態一樣，建議政改要合情合法。另一名候任副會長譚鎮國透露聯會打算成立網上論壇鼓勵青年人發表意見，期望有幾百名四十五歲以下嘅各界人才加入喎！
