自從○八年金融海嘯之後，銀行界就裁走咗好多人，雖然依家華爾街嘅元氣已回復得七七八八，但有好多員工仲係放棄金融業，寧願投向硅谷科技行業嘅懷抱。

嗰一役金融海嘯，捲走好多財富，被裁走嘅人不計其數，留得低嘅員工獎金都大幅減少，但工作時數就一樣咁多，加上行業嘅利潤仲受到新監管規定影響，仲邊有人想入行吖，華爾街唔再係大家心目中最理想嘅工作環境。

啱啱喺全球最大職業社交網站LinkedIn度見到，科技界巨頭谷歌嘅四萬七千五百名員工入面，有一千二百人曾經喺全球排名前十位嘅投行入面做過。更加難以置信嘅係，好多頂級嘅投行仲培養咗起碼七百五十個蘋果員工、二百六十個雅虎員工同一百七十五個facebook員工。

淨係睇呢啲數字，都令人覺得由金融行業跳槽去科技界嘅人才實在比想像中多。

既然硅谷嘅工作條件咁好，而科技發展又節節上升，咁硅谷會唔會變成第二個華爾街呢？

第一手消息請下載on.cc東網iPhone/iPad/Android/Windows Phone Apps