政壇：大輝拉布阻通過辣招
上次一班商界嘅立法會議員喺審議買家印花稅（BSD）時，已經扭盡六壬向政府提出多條問題「拉布」，例如討論豁免雙非嬰買樓都講咗個幾月，現時雙倍印花稅（DSD）「辣招」條例草案，仲喺立法會審議緊，呢班商界議員又照辦煮碗。
好似白鴿黨涂謹申同進出口界嘅黃定光，都聯成一線要求政府就DSD作更多讓步，希望政府容許市民首次購買住宅連車位時，車位可獲退還DSD。工業界議員林大輝講講下仲話要「申報利益受損」，因為大輝就喺現有機制下分契，結果經紀嫌佢煩唔做佢生意，最終令佢入唔到市喎。估唔到商界議員為咗拉布，連自己買樓經驗都開心「些牙」，真係有創意，之不過，負責嘅財經事務及庫務局局長陳家強睇怕就好難受嘞！
大輝自爆早前睇中又一村一個單位連車位，佢知道以一張契做晒兩宗買賣可以慳稅，但怕咗被市民鬧佢有利益衝突，所以專登向經紀要求分成兩張契，豈料個經紀嫌佢煩，索性唔做佢生意，搞到佢個心頂住。之後到阿涂接力，佢話如果一張契就唔使畀政府打稅，咁假設有市民用一張契買晒五十個太古城單位，咪發過豬頭炳囉？阿涂呢個講法理論上行得通，但太古城唔係新樓，一次過將五十間屋嘅契變成同一張契，實際有無人咁做先？
商界議員 窮追猛打
其實政府一早講咗，任何市民買完住宅後再買車位，車位就當係第二個物業，一定要打DSD，政府唔會作出讓步，可惜商界議員用咗兩個鐘頭窮追猛打「車位」問題，猛咁叫政府諗清楚。去到會議尾聲時，地產及建造界議員「大舊石」石禮謙就突然爆響口講咗一句「呢度拉布重要過財委會拉布呀」，似乎大舊石一直知道自己拉緊布，只係佢唔肯公開承認啫！
