科研經費奀過鬼 創新產業大隻講
港大校長徐立之今日正式卸任，臨別依依，佢有一番肺腑之言。徐校長話喎，如果港府繼續漠視科研發展，對科研撥款不足，香港遲早玩完。
乜話，港府對科研投入不足？係呀，徐校長直言全港所有大學嘅科研經費總和，連內地一間普通大學都不如。家陣科技發展競爭激烈，再係咁搞落去，香港想發展創新產業，直頭諗都唔使諗咯。
香港號稱國際大都會，專上院校有成八間咁多，港大、科大、中大更喺國際上薄有名氣，卻原來科研經費奀到唔奀，居然比唔上內地一間普通大學，叫人情何以堪。徐立之提醒當局，科研係長期工作，未必即時睇到效益，但對於提升一個地方嘅競爭力十分重要，佢仲話目前透過教資會研究資助局向大學撥款嘅模式有唔少不足之處，建議政府按需要及範疇，給予多啲支援。咁即係點？即係委婉批評官老爺鼠目寸光，科研撥款一味經濟效益掛帥囉。
一分耕耘，一分收穫，發展創新科技就好似耕種咁，唔係一朝一夕就可以有收成，至弊港府連播種嘅錢都慳番，都冇可能發芽開花結果喇。話時話吖，徐立之唔係第一個批評港府短視嘅知名學者，科技大學前校長朱經武亦講過，港府發展科研有兩大缺點，一係唔懂得將研究成果商品化，二係欠缺耐性。唉，港產官僚個個守財奴又無眼光，科研落後於人，一啲都唔出奇。
講真，香港競爭力每況愈下，咪就係因為科技投入不足囉。呢，早前有調查發現，亞洲國家同地區之中，南韓喺創新科技投資方面獨佔鰲頭，每位研究人員平均獲得七十六萬元資助；新加坡排名第二，甚至台灣都排名第六，人均獲得約四十萬元。反觀香港只係排第二十，敬陪末席，簡直醜死怪。
即係咁，歷屆政府口口聲聲發展創新科技，其實都係自欺欺人。董建華時代隆而重之成立科技發展委員會，曾蔭權時代亦煞有介事將創新科技列入六大優勢產業，結果統統大隻講。好似科大咁吖，十幾年前已經研發出微型電子顯示器，可惜無人識貨，最終只能為他人作嫁衣裳。
科技係核心競爭力，呢個道理人人都懂，但知道不等於做得到。梁振英政府有意重提被拉布拖垮嘅「創新及科技局」，問題係喺泛政治化嘅社會氣氛下，弱勢政府怕且又係好事多磨。唔係吖，徐立之對香港有感情，被譽為最好嘅校長，最終都係黯然離去，人才留唔住，香港點發展科技呀，叮！
