城中鏡：周永健 鄭慕智合唱R&B無甩嘴
馬會大董Anthony周永健同教育統籌委員會主席Moses鄭慕智都擁有一把靚聲，兼且唱腔出神入化，連伴奏都唔使。兩人日前出席一個青年團體舉辦嘅國際無伴奏合唱節，即場展露歌喉，同一班來自英、美、日本同本地唱家班，以無伴奏合唱（a cappella）著名黑人R&B歌手R Kelly嘅名曲《I Believe I Can Fly》，音準兼無甩嘴。薑，果然愈老愈辣。
周永健（左）同鄭慕智（右）合力清唱《I Believe I Can Fly》，繞樑三日。（受訪者提供）
出台前，Moses不忘同Anthony匿埋夾歌。兩人唱功底子厚，夾一陣就啱晒Key。一唱一和，冧爆在場過千名後生仔。國際無伴奏合唱節一直好受年輕人歡迎，老少咸宜。香港賽馬會連續第四年支持有關活動，今年仲搞搞新意，推出免費手機應用程式「app-cappella」，內有玩無伴奏用嘅工具，包括拍子機同調音笛，用呢個App訓練節奏感同音準，真係隨時想唱就唱。
