城中鏡：蜘蛛女返校園幫美化
「蜘蛛女」Lisa鄭麗莎參加一個名為「承諾分享」嘅活動，早前喺主辦單位安排下，去到馬鞍山吳氏宗親總會泰伯紀念學校同小學生展開校園美化活動，希望透過活動讓小朋友喺一個優質嘅環境學習，以更佳嘅身心狀態去發展所長，快樂健康地學習，茁壯成長。
鄭麗莎細心粉飾牆壁，畫上海底生物同彩虹。
Lisa喺粉飾校園活動前，仲即席教熱身運動，無論大人義工或小朋友無不一步一步跟着示範動作伸展身體，場面歡欣。跟住佢就同學生一齊，根據主題「世界家園」一起設計壁畫，細心咁粉飾牆壁，畫上海底生物同彩虹等，為校園添上色彩。
佢話：「承諾對我嚟講十分重要，無論對象係家人或朋友，承諾好像對我自己一份肯定，亦係一種責任感，係人與人相處中不可缺少嘅元素。」對於參加今次美化校園活動，佢話：「好高興藉住今次活動再次重返校園，喺剛才同小朋友唱歌同做運動嘅時候，想起自己小時候都希望為校園出一分力。喺活動過程中，令小朋友有校園好像家嘅信念，帶畀佢哋溫暖嘅感覺，令佢哋學會更加珍惜家園。」
