政壇：張志剛：未來行會女士天下

在場仲見到行政會議成員張志剛都喺度，原來佢係一九八○年第一屆嘅人類學學生添！佢話讀大學嘅時候男仔數量比較多，但依家就唔同晒，女仔都好叻，唔單止文科，連醫科都係女仔多，仲話第時連行會都可能無可避免會變成女權當道。

話說張志剛當時本來想報讀經濟，但點知面試時被指數學一般，中大於是提議佢讀新開嘅人類學，因此佢誤打誤撞就成為咗中大第一屆人類學嘅學生。既然係讀人類學，佢梗係要拋拋書包，以人類學分析吓點解會有女仔愈來愈叻呢個現象啦。佢嘅解釋就係，大部分女仔都比較早熟，所以喺小學階段讀書成績比較好，因而有較大機會進入較出色嘅中學和大學，接受更好嘅教育。

佢仲話唔單止讀書，依家去到邊都有出色嘅女士，好似行會成員咁，目前有六位女士，第日一定會愈來愈多，行會分分鐘都會成為女士嘅天下。佢有感而發可以理解，因為佢屋企三個小朋友，全部都係女。