財爺鬍鬚曾早前發表新一份預算案時，話本港七年後會出現結構性財赤，要考慮設立未來基金，事後畀外界狂轟佢又喺度耍「狼來了」靠嚇嘅伎倆，之不過，睇番佢尋日網誌寫嘅嘢，似乎踏實咗啲喎，唔知係咪知衰呢？

曾俊華

佢尋日喺網誌講嘅係水。佢話香港唔應該過分依賴東江水，應該負責任地探索其他新嘅水源，以應付未來供水挑戰。咁講，即係唔好臨渴先嚟掘井，到時都冇用喇！佢透露，水務署喺將軍澳一三七區預留一幅約十公頃土地興建海水化淡廠，前年年底展開策劃同勘查研究，預計明年初大致完成，二○年投產，屆時每年可提供五千萬立方米食水，相等於全年食水量百分之五，其後可進一步擴建至提供九千萬立方米。

佢強調興建海水化淡廠能提供唔受氣候變化影響嘅穩定水源，又指近年隨着逆滲透海水化淡技術嘅迅速發展，生產成本相應下降，每立方米成本由七十年代中嘅三十五元，下降至現時約十二元，雖然仍較其他水源成本略高，但佢相信未來科技發展會令成本進一步降低。嗱！咁就實事求是啲嘞！

第一手消息請下載on.cc東網iPhone/iPad/Android/Windows Phone Apps