政壇：馮英倫「無殼政助」免利益衝突
曾自言冇物業、冇地同冇感情缺失嘅新任發展局政治助理馮英倫，其利益申報日前正式曝光，一如佢自己話齋，申報內容冇任何樓宇或土地紀錄，唯一就係申報自己係菁英會等三個組織成員。馮英倫接受查詢時話，依家佢同屋企人一齊住，所以無擁有或租住任何物業，不過佢都有揸車出入代步。馮英倫身家清白，身為佢上司嘅發展局局長「波波」陳茂波相信都安樂晒嘞！
設計圖片及對白
此話何解？眾所周知，發展局工作無遠弗屆，舊年當局全力推展新界東北發展計劃，今年外界焦點就係前朝政府歎慢板嘅大嶼山發展，加上當局全力覓地建屋等工作，不過只要漏報是但一項潛在利益，就會捲入利益衝突疑雲，到時認真水洗都唔清。
上任涉漏報家族資產
就以波波為例，舊年推展新界東北發展計劃時，其家人曾捲入囤地風波，最終要數度解畫先可以平息風波；隨後上任發展局政助嘅何建宗，更因涉嫌漏報家族資產，最終喺事發後極速辭職。有政界中人話，馮英倫呢個「無殼政助」加入政府，暫時就咁睇佢嘅申報身家清白，官場暫時可望鬆一口氣。
至於馮英倫做政助能否勝任，其實佢喺本月十七日先加入政府，相信依家都係盡全力去熟習新工作，包括睇同工作相關嘅文件，但基於佢過去工作履歷，包括曾做過候任特首辦項目主任，又先後幫過多位港區全國人大代表、全國政協委員嘅私人企業打工，無論政商界都有唔少人脈經驗，有人相信由佢做政助，負責同各大政黨、持份者同關心環保規劃團體合作冇乜問題。
