SUN搞作：打橫嚟講：無人才吖嘛！包容吓啦！

嗱！遠的不說，淨係那個「政改三人組」的姊弟團，就笑死街坊矣！

睇吓嗰兩件小弟弟，一個似商場管理員大叔；另一件則係深水埗單幢樓業主立案法團法律顧問質素的哥哥仔，竟係呢度嘅政府高層，真跳海！

幾年前，仍只係低級官階的林鄭妹妹（掃把頭話語），九唔搭八之下，不明不白地跳級做咗特區阿二，家吓，仲領軍處理影響香港將來千萬年福祉的「政改」大事。

佢哋真係何德何能呀！大佬！

做得阿頭，最緊要有台型，蠱惑仔都識講：「輸人唔輸陣」嘛！即使三件騎呢怪無睇頭，但也應言之有信嘛！

明明話「有商有量」，點知「政改」諮詢期都未完，就出蠱惑，借意請個有職級嘅大陸「黨員學者」嚟噏三噏四，將廢話當聖旨，仲話係「一錘定音」，即顯示為「中央既定軌迹」，再無價講也！

既然如此，仲請全體立法會議員上海行去托杉呀？傾政改？聽意見？屁話！

政治智能和判斷力低，但又愛爭功的林妹妹，一定畀高人狂炳咗，遂隔日又出來自我「澄清」，話「一錘定音」是指與會「其他講者」的綜合意見喎！吓！指突然高調的「漏稅阿虫」？

做高官本來要有誠信，依家，係要反口覆舌、無規無矩，仲話人哋誤解佢！呢啲就係政治人才必備條件？

唉！無人才就要接受庸才？好包容啫！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府