少膽虫我呢幾日真係瞓着都識笑，點解？咪就係壹全霉要縮皮，刪版兼炒人囉！或者你哋會問，間公司苟延殘喘，又刪版又炒人喎，做腦腫點解會開心？咁就證明你哋唔了解本腦腫，更加唔了解壹全霉！

刪版何喜之有？咪就係做少啲囉！就以《爛果》為例，我哋平時作新聞需要投放大量心力，例如將喜事當白事做，慘劇當喜劇報，最重要係有咗故事大綱之後，仲要我呢個腦腫審批拍板，有時真係作到氣咳。依家好囉，刪版刪多啲，工作量少啲，我嘅心境就可以keep住硬，趁返工喺微信溝女happy吓。

至於炒人呢？呢個仲簡單。你睇吓肥豪同膠蘇之流，除咗壹全霉肯收留佢哋，仲有邊間公司會咁老襯？成班食塞米一聽到縮皮，十成十嚇到腳震，唔想炒魷失業，喺呢個生死關頭梗係要巴結我啦！「咯！咯！」呵呵，一講肥豪，肥豪就到，仲要拎住奶茶蛋撻笑住咁敲門，你話人性幾醜惡呢！唔同大家講住，仲有好多食塞米排住隊，今鋪有排歎！

第一手消息請下載on.cc東網iPhone/iPad/Android/Windows Phone Apps