城中鏡：楊張新悅笑認再有喜
教育局前政治助理楊哲安嘅太太楊張新悅尋日出席兒童慈善活動，肚凸凸嘅佢承認懷有第三胎，仲喺活動上笑住話：「冇特登話講唔講，你（記者）好犀利，神通廣大。應該三個幾月，唔係好知，到第三個都冇乜理。」但仲未知係仔定女，佢話：「我兩個女就好想有細佬，我仔女都無所謂，最緊要乖，第時對社會有貢獻。」被問到有冇唔舒服時，佢話：「自己幾堅強，比起上一代捱苦，佗B濕濕碎，我有暈，帶定話梅，呢胎特別鍾意食酸嘢。」
楊張新悅笑言生幾多個冇所謂，話係福氣嚟。
楊張新悅又話，其實第二、三胎都係意外，老公就好想要小朋友，想有個大家庭，所以生幾多個冇所謂，呢個係福氣，尤其老人家最開心。咁老公有冇抽時間陪你？佢話：「老公成日都抽時間，希望街上啲人就吓我。」兩個囡囡未知佢懷孕，因為佢哋年紀尚輕，講都唔會明，諗住見肚先話畀囡囡知，所以依家抱兩個囡囡都會加倍小心。生完第三胎係咪要封肚？佢笑說：「我唔知點封，可唔可以教我？（絕育呀。）咁誇？我諗吓先，有BB係一個福氣，唔應該絕育，生埋先諗，只係屋企嘈啲啫。」
