城中鏡：百仁善舉親子同樂

尋日上午七時左右，一眾參加者已聚集喺迪士尼樂園起點，好似百仁基金副主席顏志永、羅詠詩同陳稼晉，就同家人一齊參加三公里親子賽。顏志永除咗同太太及囝囝一齊跑之外，仲帶埋身兼中華廠商聯合會副會長嘅媽媽顏吳餘英、家姐顏明潤、妹妹顏明秀同爸爸等家庭成員一齊支持，非常難得。

至於羅詠詩就更醒目喇，事關佢活動前一日就已經帶咗囝囝入去樂園玩咗晚，尋日朝早一起身就可以同老公及囝囝一齊跑步，做善事仲可以過一個溫馨嘅假期。同場仲有香港青年聯會賢慧社召集人周沁同好姊妹Isabelle拍住上跑，周沁話今次係佢首次參加十公里馬拉松，但平日有做開運動，最後輕鬆以一小時零九分完成路程。

百仁基金主席李文俊好開心咁話今年參加人數增加至五千人，比舊年多咗超過一千人，而且參加者趨向年輕化，為活動增添唔少生氣，佢希望嚟緊慈善跑可以變成每年一度嘅盛事，並增加半馬同全馬組別。雖然佢自稱每個星期都會堅持跑步半小時以上，但佢尋日就因為掛住招呼賓客，無緣落場大顯身手。