要做專業人士一啲都唔簡單，通常要花好多時間考取專業資格同接受培訓，平時工作又忙，做運動嘅時間相對就會少。但任職律師會會長已有一年嘅林新強就例外，佢除咗熱愛網球，多年來仲為律師會引入唔同種類嘅興趣小組，確係「周身刀、張張利」。其實佢仲有把「刀」好利，就係買黃牛波飛好有心得，但咁咪助長咗啲人炒黃牛？

設計圖片及對白

林新強○四年加入律師會，由理事做到依家會長，「年資」差不多有十年，其中最自豪嘅政策，就係○五年起創立興趣小組，至今總共成立咗二十三個，其中十三個係體育活動，包括足球、籃球、排球、網球、游泳等，甚至連龍舟都有。

講到佢最愛嘅網球，自不然講起唔少「波經」。原來佢同一班網球發燒友喺○六年成立咗「朗豪網球會」，仲做埋榮譽會長，約有一百人定期打波聯誼。佢仲有鋪睇波癮，○八年曾組團去上海睇男子網球年終賽（Masters Cup），可以現場睇前列分子拿度、祖高域、費達拿打波，話唔定可以偷到師。

講到撲波飛咯喎，佢坦言有買黃牛飛睇波，仲分享「秘訣」添！佢話去得多睇波，就會留意到邊啲黃牛黨係「貨真價實」，唔會買錯貨。佢又話有啲人趁開波後先買飛，因票價會即時下跌，價錢抵好多，唔話佢係買黃牛波飛老手都冇人信啦！但好多地方炒黃牛波飛都係違法，就算唔違法，助長啲人炒飛係咪冇咁好呢？

第一手消息請下載on.cc東網iPhone/iPad/Android/Windows Phone Apps