仲記得舊年因為議員就預算案「拉布」，好彩立法會主席喺最後關頭剪布，預算案先獲得通過，真係險過剃頭。財爺鬍鬚曾早前公布新一份預算案，多名議員重施故技，揚言下月審議預算案期間「拉布」，都咪話唔驚。鬍鬚曾尋日就喺網誌嗌定乾塘先，希望班議員高抬貴手。

鬍鬚曾嗌定政府同公營機構六月乾塘。（資料圖片）

鬍鬚曾喺網誌話，立法會早前通過咗逾七百八十億元臨時撥款，而呢筆撥款大約相等於政府全年開支兩成，足夠應付四月同五月開支，但政府部門同公營機構將喺六月初開始陸續「無錢用」，期望立法會喺未來兩個月內盡早完成整個審議程序，兼且通過預算案咁話。睇嚟佢都真係有啲震騰騰喎！

面對外界批評本港稅制唔公義，佢就話依家稅制已一定程度體現「能者多付」原則，但同時唔排除將來可能需要調整，強調正如佢向同事所言，喺分配資源時唔可能做到皆大歡喜，若果所有人都有一點不滿，「大概已經找到最適當的平衡」。

佢又提醒，美國可能喺一五年上半年開始加息，希望大家必須小心，做好風險管理，再次呼籲議員盡快審議並通過「雙倍印花稅」（DSD）草案，以因應外圍環境轉變，迅速調整相關需求管理措施，減少市場的波動喎！要做得好，唔該佢加多幾錢肉緊，游說班議員通過DSD囉！

第一手消息請下載on.cc東網iPhone/iPad/Android/Windows Phone Apps