政壇：佔中宣傳愈搞愈亂

但「中紙」呢個名聽落好似平日舉起代表粗口嘅「中指」咁，封面雀仔嘜頭更被「斷頭」，同佢哋嘅「和理非非」宗旨（和平、理性、非暴力及非粗口）唔多夾喎！

創刊封面「取消佔中」

創刊號封面仲打正旗號宣布「取消佔中」添！究竟仲係咪佔中？但打開「中紙」睇吓就知「取消」佔中只係噱頭，內文標題仲寫到明「除非有真普選，中，實佔！」真係愈搞愈複雜，愈搞愈混亂！

對於「中紙」嘅由來，負責編製「中紙」嘅成員徐少驊解畫，話「中紙」可解作宗旨、中止又或舉起代表粗口嘅「中指」，隨意解讀都冇問題喎！好似「中止」社會嘅不公義、舉起「中指」向政府說不，甚至揸緊佔中「宗旨」都得。不過，佢哋話「中紙」其實只係簡單解作「佔中嘅報紙」。咁樣都得，又算唔算係「語言藝術」呢？

陳淑莊反服貿「黐餐」

至於佔中義工隊目前規模大約二百人，分別負責街站運作同擔任商討日促導員等，啱啱去完台灣立法院聲援「反服貿」學生嘅前立法會議員Tanya陳淑莊都係義工隊成員之一。

Tanya透露，留台三日唔愁衣食，皆因全台各地都有民眾向學生送出物資，佢就順理成章不停「黐餐」，就連的士司機知道佢去立法院聲援學生，都提出要免費載佢哋一程，好彩Tanya堅持畀錢，否則就真係又食又拎喇！