香江醫術遜台灣 樣樣倒退情何堪

唔係太一叮長他人志氣，滅自己威風o架。呢，菲律賓人質事件中受槍傷導致下顎嚴重損毀嘅易小玲，喺香港歷經三十三次下顎整形手術均告失敗，搞到生不如死，轉去台灣接受一次手術，下顎即告成功修復，重獲新生；仲有吖，罹患先天性單邊肺部發育不全綜合症，只有半邊肺功能嘅女嬰茵茵，喺香港冇醫生夠膽為佢做手術，奄奄一息，去到台灣接受手術即轉危為安，家陣同其他小朋友一樣咁生龍活虎。

台灣做得到，香港做唔到，呢啲咪叫做事實勝於雄辯囉。市民有眼睇，「東方報業民意調查」顯示，三成七受訪市民指香港醫療敲響警號；三成三認為香港醫療技術不足；兩成二稱港台醫療水平此消彼長。醫療界人士講得啱嘞，以前香港自命醫療系統完善，又有人才，水準高過台灣，依家搞成咁，真係要好好反思究竟出咗咩問題。

出咗咩問題？梗係前朝廢柴周一嶽孭鑊喇，佢任內八年，香港醫療就衰足八年。唔係咩？正如業內人士話齋，自從周一嶽上場，醫療資源嚴重錯配，培訓資助大縮水，本港醫生好難有機會到海外學習新知識。反觀台灣，每年都大手筆撥款保送醫護人員到海外培訓，香港唔夠人哋揮，根本不足為奇。嗱，上述調查又顯示，三成七受訪者憂慮本港醫學發展隨時被鄰近地方超越；三成指香港醫療優勢漸失；兩成六直斥香港醫學不務正業。

講開又講，周一嶽有名你叫「每周一鑊」，在任期間醫療事故無日無之，大鑊爆完一單又一單，沒有最醜，只有更醜。最離譜嘅係佢知少少扮代表，對易小玲嘅手術指手畫腳，而公立醫院擦鞋第一，專業第二，卒之搞到延誤醫治，累人累物。叮！

周一鑊管理無能，醫療機構熱衷內鬥，受害嘅點止易小玲同小茵茵呀。連醫生團體都睇唔過眼，大爆內醜，直指醫管局只知益自己友，不斷增加顧問人數，但對前線人手不足、七個蓋冚十個煲視若無睹，咁搞法，唔出事至奇。難怪四成受訪者狠批官員無能；三成六直指政策失敗；兩成批評周一嶽尸位素餐。

唉，曾經係亞洲四小龍之首嘅香港，家陣教育倒退，經濟倒退，競爭力倒退，醫療水平也倒退，搞到樣樣不如人，如果港府仲有少少羞恥之心，唔該快快撥亂反正，叮！